Орон даяар элсэлтийн ерөнхий шалгалт явагдаж дууслаа. Тиймээс ч бид цаг үеийн хамгийн эрэлттэй мэдээлэл болох их, дээд сургуулийн мэдээ мэдээллийг нэг дор төвлөрүүлсөн “Еlselt.mn” сайтын ерөнхий редактор Л.Цэцэгжаргалтай уулзаж ярилцлаа.
- Боловсролын онлайн экспо “Elselt.mn” сайт саяхнаас гарах болсон. Ямар зорилготой сайт болох талаар яриагаа эхэлье?
- “Elselt.mn”сайт маань жилийн өмнөөс төлөвлөгдөж явсаар, албан ёсоор үйл ажиллагаагаа эхлүүлээд зургаан сар болж байна. “Үнэт зүйлтэй, өрсөлдөх чадвартай, боловсролтой, эрүүл монгол хүнийг төлөвшүүлэхэд мэдээллээр хангана” гэсэн эрхэм зорилготойгоор бид үйл ажиллагаагаа явуулж байна. Хүн амьдралынхаа туршид олон сонголттой нүүр тулдаг. Эдгээр сонголтын хамгийн чухал нь мэргэжлээ сонгох. Тиймээс залуусын мэргэжил сонголтод бодитойгоор нөлөөлж, хувь хүний хөгжилд нөлөөлөх нь бидний ажлын гол зорилго. Үнэндээ монголчууд маань хүүхдийнхээ мэргэжил сонголтод анхаарч урьдчилан төлөвлөдөггүй. Төлөвлөдөггүйгээс болоод мэргэжлээ буруу сонгох, цаг хугацаа алдах, мөнгө санхүүгээр хохирох асуудлууд байсаар байна. Үр дүнд нь диплом өвөртөлсөн ажилгүйчүүдийн тоо жил ирэх тусам нэмэгдсээр байгаа.
Гэтэл нөгөө талдаа байгууллагууд хүний нөөцийн хомсдолд ороод удаж байна. Энэ асуудлыг л шийдэхийн тулд бид өөрсдийн хувь нэмрээ оруулж, ажилтай орлоготой өрсөлдөх чадвартай боловсролтой монгол хүнийг төлөвшүүлэхэд үйл ажиллагаагаа чиглүүлэн ажиллаж байна.
- Боловсролын сайт хийх анхны сэдэл хэрхэн төрсөн бэ?
- Хэвлэл мэдээллийн салбарт ажилладагийн хувьд нийгэмд хэрэгтэй ямар нэг юм хийх юмсан гэсэн хүсэл зорилго байсан. Олон жилийн өмнөөс л боддог, ажигладаг байлаа.
“Зууны мэдээ” сонинд ажиллаж байхад “Жайка” олон улсын байгууллагатай хамтран ажиллах боломж тохиосон. Японы сайн дурын гишүүд Монгол Улсын өнцөг булан бүрт бизнес, сургууль, цэцэрлэг эмнэлэг гэсэн чухал салбаруудад ажиллаж, өөрсдийн арга барил, ур чадвараа тухайн байгууллагуудад суулгаж, ганц хүн гэлтгүй маш их өөрчлөлтүүдийг нэвтрүүлсэн байсан. Эндээс Япон хүмүүс маш их төлөвлөдөг, урьдчилан бэлддэг болохыг анзаарч, Япон улсын хөгжлийн гол үндэс нь “Хувь хүнээ маш сайн хөгжүүлсэнд юм байна” гэдгийг ойлгосон.
Монгол хүний оюуны чадвар өндөр учраас бид мэдлэгт суурилсан эдийн засгийн хөгжлийг дэмжих хэрэгтэй юм байна. Залуус маань оюун ухааны спортоор дэлхийд тэргүүлээд гайхамшигтай амжилтуудыг гаргасаар байгаа. Тэгэхээр нийгмийг өөрчлөх хамгийн чухал хүчин зүйл нь яах аргагүй боловсрол. Боловсролтой хүн ядуу амьдардаггүй. Боловсролтой хүн өөрийн гэсэн үзэл бодолтой байж, аливаа асуудалд нухацтай ханддаг.
НҮБ-аас 2030 он хүртэл улс орнуудын даган мөрдөх, Тогтвортой хөгжлийн 17 зорилтын “Чанартай боловсролыг дэмжих” гэсэн зорилттой бидний ажил уялдаж байгаа. Дээрх зорилтуудын хамгийн чухал зорилт нь. Чанартай боловсролыг дэмжээд иргэдээ боловсролтой болгосноор “Эрүүл мэндийг дэмжих”, “Ядуурлыг устгах”, “Зохистой хөдөлмөр ба эдийн засгийн өсөлтийг дэмжих” “Өлсгөлөнг зогсоох” зэрэг бусад бүх зорилтуудтайгаа уялдаад шийдээд явах боломжтой юм. Тиймээс нийгмийн хөгжлөө дагаад боловсролын салбарын мэдээ мэдээллийн төрөлжсөн сайт хийх нь хамгийн зөв сонголт байсан.
- “Elselt.mn” сайт уншигчдад яг ямар үйлчилгээг санал болгож байгаа вэ?
- Аливаа юманд нэр маш чухал байдаг. “Элсэлт” гэдэг нэр маань өөрөө их утга учиртай. Элсэлт авч байна, элсэлтийн шалгалтад тэнцлээ, элсэн орлоо гэх зэргээр утга агуулгын хувьд хамгийн тохиромжтой нэр. Анзаарсан бол ихэнх их, дээд сургуулиудын сайт, гадаад нэрний үсгүүдээрээ товчилсон байдаг. Орон нутгийн иргэд маань улсын, хувийн их сургуулиудаа ялгадаггүй юм байна. Түүнээсээ болоод буруу сонголт хийн цаг хугацаа мөнгө санхүүгээр хохирох тохиолдол маш их байдаг юм байна.
Тиймээс бид улсын болон, хувийн их сургуулиудыг тус, тусад нь маш ойлгомжтойгоор санал болгож байгаа. Их дээд сургуулиудын элсэлтийн зар бүтэн жилийн турш байрших учраас хүүхдийнхээ мэргэжил сонголтыг 1-2 жилийн өмнөөс төлөвлөж бэлдэх боломжтой юм. Сургалтын төв хэсгээс тухайн чиглэлээр сургалт явуулдаг байгууллагуудын мэдээллийг ч авах боломжтой.
Сайт маань боловсролын байгууллагуудын зар сурталчилгааны талбар буюу
- Онлайн экспо
- Мэдээллийн хэсэг гэсэн хоёр үндсэн хэсгээс бүрдэж байгаа.
Гол хэсэг болох онлайн экспод:
- Их дээд сургууль
- Олон улсын сургуулиудад зуучилдаг компаниуд
- Сургалтын төв
- Ерөнхий боловсролын сургууль,
- Цэцэрлэг гэсэн байгууллагуудын элсэлтийн зар байршина. Ерөөсөө л балчир наснаас өгсүүлээд бүх насныхны боловсролын хэрэгцээнд зориулагдсанаараа манай сайт онцлог болж чадсан. Аливаа экспо тодорхой байршилд хэдхэн хоног болоод өнгөрдөг. Тэгвэл www.elselt.mn сайтын онлайн экспо бүтэн жилийн турш, хоногийн 24 цаг нээлттэй байна. Интернэт орчинд хил хязгааргүй орон зайд дэлхийн хаанаас ч орох боломжтой юм.
- Боловсролтой холбоотой мэдээллийг бүгдийг нэг дороос авч болох нь ээ?
- Тэгэлгүй яахав. www.elselt.mn сайт маань зөвхөн их, дээд сургуулиар хязгаарлагдахгүй. Хүн амьдралынхаа турш сурч хөгжих боломжтой байдаг. Тиймээс сургалтын төв хэсэгт маань бизнес, англи хэл, банк санхүү, хүний нөөц, жолооны курс, иог, бассейн гээд сургалт явуулдаг байгууллагуудын элсэлтийн зар байршина. Тогооч, үсчин, гоо сайхны мэргэжил олгох сургалтуудаас гадна, хүүхдийн хичээлийн хоцрогдол, оюун ухаан, хөгжим баллет гэх зэргээр сургалтын хэрэгцээ айл болгонд гардаг юм байна.
Гэртэйгээ ойр цэцэрлэг сургуулийн мэдээллээс гадна, Математикийн гүнзгийрүүлсэн сургууль, Япон, Хятад хэлний болон Кембрижийн хөтөлбөртэй ЕБС-иудын мэдээллийг авах боломжтой. Тэр болгонд google -ээс хайн цаг үрэхийн оронд нэг дороос elselt.mn – ээс орж харах судлах боломжийг бид бүрдүүлж байна.
Давхар цаг үеийн мэдээ мэдээлэл, онцлох ярилцлагууд, тэтгэлгийн зар зэрэг боловсролтой холбоотой залууст сэдэл урам зориг өгөхөөр мэдээллүүд байршина. Бид багаараа бүтэн жил гаруй судалж, төлөвлөж хийсэн учраас, сайтын маань булан бүр утга учиртай, боловсролын хэрэгцээг бүрэн хангахуйц боловсронгуй болж чадсан.
Тиймээс боловсролын байгууллагууд болон боловсролд ач холбогдол өгч нийгэмд сайн сайхныг түгээх хүсэлтэй хувь хүн албан байгууллагуудтай бид хамтран ажиллахдаа баяртай байх болно.
Бидний зорьж байгаа ажил боловсролын байгууллагуудын дэмжлэгтэйгээр биелэлээ олж байгаа учраас хамтран ажиллаж байгаа Улсын болон, хувийн их дээд сургуулиуд, Эмпати хөтөлбөртэй сургуулиуд, Япон хэлний сургуулиуд, Сургалтын төвүүддээ баярлаж байгаагаа энэ дашрамд хэлмээр байна.
Elselt.mn сайттай дараах хаяг, утсаар холбогдох боломжтой.
Хаяг: Сүхбаатар дүүрэг 1-р хороо UBH center 10 давхар 1015 тоот
Утас: 96670909 96090707
