Боловсрол, соёл, шинжлэх ухаан, спортын сайд Ё.Баатарбилэг төрийн өмчит их дээр сургуулийн захирлуудыг хүлээн авч, салбарын талаар санал солилцлоо. Төрийн өмчийн 12 их дээд сургуулийн захирлууд дараах саналуудыг сайдад танилцууллаа.
Засгийн газрын тогтоолоор Судалгааны их сургуулийн талаар баримтлах бодлого баталсан. Уг бодлогын хэрэгжилтийг хангах үүднээс Дээд боловсролын тухай хуульд Судалгааны их сургуулийн тухай заалт, мөн Эндаумэнт сангийн тухай заалтыг оруулах, мөн төрийн өмчит их дээд сургуулиудад олгох яамны тогтмол зардлын санхүүжилт сүүлийн жилүүдэд олгогдоогүй. 2019 оны төсөвт мөн тусгагдаагүй байгаа юм.
Боловсролын тухай хуульд “Төрийн өмчийн боловсролын сургалтын байгууллагыг тогтмол болон норматив зардлаар санхүүжүүлнэ” гэж заасан ч сүүлийн жилүүдэд хэрэгжихгүй байгааг шийдвэрлэхэд дэмжлэг болохыг хүслээ.
Засгийн газрын тогтоолоор батлагдсан Оюутны хөгжлийн зээлийн журмын дагуу төрийн өмчит их дээд сургуулиудын хувьд нийт олгогдсон квотын 30 орчим хувьд л оюутны зээлд хамруулсан. Зээл авах болзол, нөхцөлийг эргэн харах, зөөлрүүлэх шаардлагатай байна гэв.
2019 онд Ерөнхий боловсролын сургуулийн төгсөгчдийн тоо 18000 орчим буюу өнгөрсөн оныхоос огцом буурч байгаатай холбогдуулан элсэлтийг орон нутагт зохион байгуулах, элсэлтийн босго оноог дахин хянаж үзэх, оюутан элсүүлэх журамд зохих өөрчлөлт оруулах шаардлагатай байгааг дурьдлаа.
Монгол Улсын Засгийн газраас 2024 он гэхэд Азийн шилдэг 100 их сургуулийн тоонд Монгол Улсын 4 их сургуулийг оруулах зорилт тавьсантай холбогдуулан, Олон Улсын эрэмбэ тогтоодог QS Ranking байгууллагатай хамтран ажиллаж байна. Энэ хүрээнд нийт 300 000 ам.доллар нэхэмжилснийг үе шаттай хэлэлцээний дүнд амжилттай бууруулж 100 000 ам.доллар болгосон. 2020 оноос уг эрэмбэ тогтоолгох чиглэлээр нийт 2 тэрбум төгрөгийн зардлыг 2020 оны улсын төсөвт суулгахад дэмжлэг үзүүлэхийг хүслээ.
БСШУС-ын сайд Ё.Баатарбилэг, дээрх саналуудтай нарийн танилцаж дахин удирдлагуудын түвшинд уулзах боломжтой гэв.
Яамны 2019 оны төлөвлөгөө батлагдах гэж байгаатай холбогдуулан төрийн өмчит бүх их дээд сургуулиуд яамны оролцоо дэмжлэгтэй хийж хэрэгжүүлэх ажил, арга хэмжээний төлөвлөгөөг яаралтай гаргаж ажлаа нарийн төлөвлөх. Боловсролын тухай багц хуулийн хүрээнд Дээд боловсролын тухай хуулийн шинэчилсэн найруулга хийж, гуравдугаар сардаа багтаан их дээд сургуулийн удирдлагуудтай ажил хэрэгч хэлэлцүүлэг зохион байгуулахаар болов.
Мөн чанаргүй их дээд сургуулийн тоог цөөлөх шаардлагын дагуу шалгалт үнэлгээг яамнаас зохион байгуулах саналтай байв.
МУИС, ХААИС, МУБИС, ШУТИС гэсэн дөрвөн сургуулийн удирдлагыг оролцуулсан ажлын хэсэг байгуулж, Судалгааны их сургууль болох, цаашлаад хотоос гадна цогцолбор байдлаар байгуулах боломжийг судална гэв.
БСШУСЯ 2019 оныг Ёс зүйн боловсролын жил болгон зарлаж байна. Энэ чиглэлээр боловсролын байгууллагуудтай нэлээд нягт хамтран ажиллана. Багш нарын сахилга хариуцлага ёс зүйг нэмэгдүүлэх, түүгээрээ өрсөлдөх хөшүүрэг болохуйц арга хэмжээг санаачил гэлээ.
